DIE KUNS VAN KOPHOU
‘DAAR IS ALTYD NÓG ’N PLAN’
ZAVION KOTZE-BRERETON, troubeplanner
Dis al ’n tradisie. Met ’n paartjie se eerste huweliksherdenking bel troubeplanner Zavion Kotze-Brereton altyd om hulle geluk te wens en deel ’n brokkie waarvan die bruid op haar troudag salig onbewus was. Soos dat die koek die oggend negeuur platgeval het. Of die DJ het gekanselleer. Dan is die bruid altyd verbaas, want alles was dan so perfek . . .
En alles wás, danksy Zavion. Want hy het nie net immer ’n plan B nie, maar ook ’n plan C, D en E.
“Ek raak nooit paniekerig nie. Daar is altyd ’n uitweg,” sê die man wat vanjaar met Demi-Leigh Nel-Peters en Tim Tebow se sprokiestroue selfs hul seremoniemeester, die Amerikaanse TV-aanbieder en sportkommentator Scott Hanson, verstom het – hy was nog nooit by ’n okkasie waar alles so tot op die minuut betyds was nie.
Met tussen 120 en 150 troues per jaar
