Baie oor Goosen verdoesel
Petrovna Metelerkamp se Jeanne Goosen: ’n Lewe vol sinne is maar die vierde biografie oor ’n vroueskrywer in Afrikaans ná J.C. Steyn s’n oor M.E.R., Egonne Roth s’n oor Olga Kirsch en Metelerkamp s’n oor Ingrid Jonker. Ek het dus in Maart met groot opwinding my eksemplaar by die Woordfees op Stellenbosch aangeskaf, maar my opwinding het gou in teleurstelling oorgeslaan.
Ná twee lowende resensies – dié van Herman Lategan in verlede week en Joan Hambidge s’n in die Afrikaanse dagblaaie voel ek verplig om my bedenkinge oor die boek te lug. Goosen se lewensverhaal is wel besonder toeganklik en onderhoudend geskryf, maar dit is ’n vlotheid wat saamhang met ’n oppervlakkigheid en ’n nonchalantheid ten opsigte van basiese joernalistieke en navorsingsreëls.
