Ou kop op jong stoetteler se lyf
Die boer is nie iemand op sy eie eilandjie op die plaas waar hy sy dagtaak uitvoer nie. Hy het groot verantwoordelikhede, wat wissel van die produksie van kos vir die land tot die handhawing van biosekerheid ter wille van boer en verbruiker.
In die geval van die veebedryf hou hy ook sy medeveeboere se toekoms in die holte van sy hand. Dit is dus ononderhandelbaar dat hy veesiektes deurgaans in belang van die hele bedryf met goeie biosekerheid moet afweer, anders trek almal aan die kortste ent wanneer ’n gevreesde siekte toeslaan.
Aan die woord is mnr. Derick le Roux, wat aan die hoof staan van die Xourel Limousin-stoetery by Lichtenburg in Noordwes. Hy is tydens 2019 se LRF-veeskool by Aldam as die Pick n Pay Suider-Afrikaanse Stoetteler van die Jaar bekroon.
