IS DAAR LEWE – EN LIEFDE – NÁ 60?
Moenie jouself probeer flous nie – die lewe begin nie op 60 nie, maar dit eindig ook nog lank nie daar nie. Jy ondergaan ook nie oornag ’n metamorfose sodat jy ná 60 feitlik onherkenbaar vir jou mense wakker word nie.
Mens se unieke persoonlikheid en karakter verander nie werklik deur die jare en dekades nie. Daar mag groei en ontwikkeling na volwassenheid wees, maar inherent behou jy jou geaardheid. As jy dus jare lank ietwat van ’n moeilike mens was, gaan jy nie in ’n engel verander net omdat jy 60 is nie. Jy sal eerder daarop afstuur om later jare ’n befoeterde bejaarde te wees.
Die teendeel is ook waar. Jy hoef nie skielik vreeslik kuis en besadig te raak die oomblik wat jy oor ’n mensgemaakte Rubicon beweeg nie.
Dis hierdie onrealistiese verwagtinge oor die lewe ná 60 wat individue soos Freda* die meeste grief. Sy pas nou eenmaal nie in die boksie waarin ’n groot deel van die samelewing haar graag wil sien nie.
