DIE LEWE NÁ #METOO
HY IS net ’n skadu van die man wat hy eens was – die een wat gekonkel, geskree en geboelie het om een van die rykste en magtigste figure in Hollywood te word.
Toe Harvey Weinstein met ’n ysterloopraam by ’n hofsaal in New York ingeskuifel kom, het hy weinig ooreenkomste getoon met die dominerende figuur wat tot skaars twee jaar gelede nog loopbane kon maak of breek. Terwyl hy by ’n groep vroue verbygestap het – onder wie die aktrises Rosanna Arquette en Rose McGowan met plakkate met die woorde: “Ek staan by die oorlewendes” daarop – het hy sy oë neergeslaan.
Die loopraam was skynbaar net wat ’n mens van ’n Hollywood-impresario sou verwag; ’n skaamtelose set om simpatie te wek. Maar sy hoofprokureur, Donna Rotunno, ontken dit.
Verlede jaar was Weinstein (67) in ’n motorongeluk in die noorde van die deelstaat New York betrokke nadat hy vir ’n takbok uitgeswaai het. Hy moes ’n drie uur lange rugoperasie ondergaan. Die loopraam is wel noodsaaklik, beweer Donna (44), ’n lang, treffende vrou met ’n voorliefde vir ontwerpersuitrustings, hemelhoë spykerhakke en kettinghalssnoere. ’n Voormalige kliënt het haar al as “ ’ n bulhond” beskryf. Maar dit lyk of sy haar storie sal moet ken om Weinstein te verdedig.
Tydens sy verhoor, wat tot ses weke kan duur, sal hy op vyf aanklagte teregstaan, waaronder die verkragting en seksuele aanranding van twee vroue. Die een is Mimi Haleyi, ’n voormalige produksieassistent, wat beweer Weinstein het in 2006 in sy woonstel in New York teen haar sin orale seks met haar gehad.
Die ander vrou,
