DIE KIEM WAT JOU BEURSIE KAN KNAK
AS China nies, kry die hele wêreld ’n verkoue, lui die gesegde. Maar deesdae is dié “nies” nogal ernstig en het die “verkoue” verreikende gevolge.
Ná die uitbreking van die dodelike coronavirus in Januarie word beeld ná beeld van verlate Chinese stede die wêreld ingestuur. Die strate en vervoerstelsels, wat gewoonlik wemel met mense, is onheilspellend leeg en stil.
Fabrieke, winkels, skole, restaurante en pretparke is gesluit en die land se inwoners bly op bevel van die owerhede tuis agter geslote deure.
Hubei, ’n binnelandse provinsie in Sentraal- China, eens ’n besige sentrum wat aan byna elke hoekie van die wêreld verbind was, is nou die afgesonderde middelpunt van die nuwe coronavirussiekte met die amptelike naam COVID-19. En dis van die res van die wêreld afgesny.
Teen druktyd het COVID-19 al die dood van 1 775 mense op die Chinese vasteland en vyf elders ter wêreld – een elk in Hongkong, die Filippyne, Japan, Frankryk en Taiwan – veroorsaak. Meer as 71
