這个角度是土星環內底看著 ê 土星。2017 年 ê 時陣，NASA 頭一擺 kā Cassini 太空船 送入去 土星 kah 土星環 之間。飛入去 ê 過程，機器人太空船翕幾若百張相片，翕著以前毋捌看過 ê 土星大氣結構 ê 細節。看倒轉來 ê 時陣，太空船嘛翕著 hŏng 印象足深 ê 景色。這張相片是飛上倚土星進前幾若點鐘翕--ê，有翕著踅 土星 北極 無四常 ê 六角雲。土星 ê B 環是相片內底較倚咱這爿--ê，暗色 ê Cassini 溝仔 kā A 環 kah B 環分開。若是 較斟酌 kā 看，你會揣著 kā F 環 chhōa 路 ê 兩粒 細粒 衛星。F 環是看會著--ê 上遠 ê 土星環。這張相片翕了過幾若個月，加上超過 10 冬 ê 探索 kah 發現，Cassini 太空船 ê 燃料已經無夠用矣。紲落來伊會 飛 tùi 土星 ê 大氣層，落尾會 tī 內底 熔去。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221223/ 影像：NASA, JPL-Caltech, Space Science Institute 音樂：高小糕 GaoXiaoGao 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221223.html Powered by Firstory Hosting