NGC 4631 是一个大閣媠 ê 捲螺仔星系。伊是 側向星系，離咱有 2500 萬光年遠，是 tī 北方星座 獵犬座 遐。這个星系看起來敢若是一个小可仔彎彎 ê 栓仔，對一寡人來講這有成一隻宇宙魚仔，另外一寡人就 kā 伊叫做海翁星系。毋管按怎，伊 ê 大細差不多 kah 咱 ê 銀河 平大。Tī 這張遮爾清楚 ê 相片 內底，黃色 ê 星系核、烏暗 ê 塗粉雲、明亮 ê 藍色星團、kah 紅色 ê 恆星形成區攏足明顯--ê。海翁星系頂懸彼个較細 ê 長株圓星系 NGC 4627，是伊 ê 星系伴。咱會當 tī 這張深空相片內底看著 較暗 ê 恆星流，這是較細 ê 星系伴 tī 古早以前 kah 海翁星系相拄幾若擺，造成伊 ê 結構去予破壞了後 ê 殘骸。咱嘛知影講，海翁星系噴出 ê 星系暈是燒氣體造--ê，會發出 X-光。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221006/ 影像：Michael Sherick 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221006.html Powered by Firstory Hosting