Umongo womphefumlo

By Monwabisi Mgulwa

Le ncwadana ixoxa ngeengcinga zombhali malunga nomba wokubakho okanye ukungabikho komphefumlo. Esebenzisa iingcinga zakhe, umbhali ufikelela kwingcinga yokuba ikho lento ingumphefumlo. Umbhali ubuya asebenzise iingcinga zakhe ukuxoxa ngemvelaphi kunye nemisebenzi yomphefumlo. Uxoxa ngomphefumlo ongumntu kunye noko kusingqongileyo. Ekugqibeleni uvakalisa iingcinga zakhe malunga nelakwelemimoya.

• Language: Xhosa
• Publisher: Monwabisi Mgulwa
• Release date: Jul 20, 2020
• ISBN: 9781005141899

Monwabisi Mgulwa

My graduate studying of Psychology, Sociology, Socio- Cultural Anthropology and Philosophy contributed strongly to the choice of my writings.Applied research directed the unveiling of facts and truths regarding AmaHlubi Culture and in the attempt to destroy the religious organization Church of God and Saints of Christ which was established by Prophet Enoch Mgijima. Philosophy questioning and reasoning serves as background for the book Umongo Womphefumlo (The Gist of the Soul).Study of Human Resources and Business Management and Labour law influenced Isikhokhelo Esisebenzisekayo Solawulo Olufanelekileyo (Practical Guide of Effective Management) which is the latest eBook published.The rest of my writings stem from the love of literature.

Book preview

Umongo womphefumlo

Ibhalwe ngu: Mgulwa M.D

Published by M.D. Mgulwa at Smashwords.

Copyright Mgulwa MD 2020

All rights reserved. No part of this ebook may be reproduced or transmitted either electronically or mechanically without written authorisation by the author

Smashwords Edition, License Notes:

This ebook is licensed for your personal enjoyment only. This book may not be re-sold or given away to other people. If you would like to share this book with another person, please purchase an additional copy for each recipient. If you’re reading this book and did not purchase it, or it was not purchased for your use only, then please return to your favorite ebook retailer and purchase your own copy. Thank you for respecting the hard work of this author.

Isalathiso

i. Ingabula zigcawu

1. Yintoni umphefumlo

2. Imvelaphi yomphefumlo

3. Imisebenzi yomphefumlo

4. Umphefumlo noko kusingqongileyo (Isigaba 1)

5. Umphefumlo noko kusingqongileyo (Isigaba 2)

6. Kwelemimoya

i. Ingabula zigcawu

Le migcana ilandelayo imalunga neengcinga zam ngokubhekiselele kumba womphefumlo. Okokuqala ndisebenzisa iingcinga zam ukubonakalisa ubukho bomphefumlo, imisebenzi yomphefumlo kunye nentsukaphi yomphefumlo. Ndisebenzisa imizekelo endiyicingayo ngelo xesha ukubonakalisa, ngokweengcinga zam, ubukho nokungabikho bomphefumlo. Ndibuya ndithethe ngezidalwa endicinga ukuba zinemiphefumlo ngokuphefumlelwa nguMniki miphefumlo. Ezo zidalwa ndizibandakanya xa ndithetha ngomphefumlo noko kusingqongileyo. Ezo zidalwa ndicinga ukuba ziphefumlelwe ziquka umhlaba, amanzi, izityalo njalo-njalo. Ndibuya ndithethe ngesi sidalwa singumntu esingundoqo wale ncwadana.

Ndigqibela ngokuthetha ngeengcinga endinazo malunga nokunduluka komphefumlo.

Ndisatshaya.

Monwabisi D. Mgulwa

Kamastone Village

KuKomani

July 2020

1.Yintoni umphefumlo

Le ncoko yam ndiyisungula ngokuzama ukuchaza la magama mabini ndinqwenela ukuthetha ngawo. La magama ngala: igama elithi umongo kunye negama elithi umphefumlo.

Ndifumana kungekho nzima kuyaphi ukuchaza igama elithi ‘umongo’. Kodwa igama elithi ‘umphefumlo’ ndilibona lifuna ithuba elaneleyo lokuliqwalasela. Nakubeni liligama eliqhelekileyo ukulithetha nokulisebenzisa akululanga ukwazi ukuba lichaza ntoni kanye kanye eli gama. Okanye mandithi akululanga ukuchaza ukuba limele ntoni na eli gama.

Kanti ke neli lithi umongo lineentsingiselo ezahlukeneyo ngokwendlela nohlobo elisetyenziswa ngalo.

Umongo wethambo lelaa futha libonakala lula ngaphakathi kula mathambo made, njengethambo likaxhongo okanye uthambofuphi. Phofu ke nala mancinane amathambo anawo umongo qha uqapheleka lula kula made. Xa ulophule phakathi eli thambo uyabonakala umongo. Kodwa ubonakala ngcono xa ithambo elo beliphekwe nenyama kuba umongo uyaqina uyeke ukuba ngamafutha aphalalayo. Phofu ke umongo uyafumaneka nakumathambo omqolo. Kodwa ke wohlukile umongo wamathambo omqolo nomongo wala mathambo sendiwachazile, kangangokuba owamathamb’ omqolo ubizwa ngokuba ngumnqonqo. Usenokuba ke ubizwa ngeliny’ igama kuloo ndawo yakho.

Mhlawumbi unamagama awohlukileyo nje yinto yokuba loo mntu wayethiya waqwalasela imisebenzi yayo okanye mandithi wabanengcinga yokuba inoba imisebenzi yayo yohlukile.

Iingcali zithi umongo nguwo ovelisa iiseli zomzimba ezithutha umongomoya egazini ziwuse kuwo onke amalungu omzimba. Kanti ke umongo ukwavelisa neeseli ezingamajoni omzimba. Ukubangaba akaveliswa umongo, loo nto itheth’ ukuba umzimba uzakuswela umongomoya kwaye ungakhuseleki kwizifo.

Kanti ke kwakhona eli gama lithi umongo lisetyenziswa njengesaci. Xa ubani ethetha into komnye okanye kwabanye abantu ze bathi bafuna umongo wale nto ayitshoyo, bafuna eyona ntsingiselo okanye owona ndoqo wentetho yakhe. Ngoko ke xa eli gama lithi mongo lisetyenziswa kwintetho kokuzeke kufunwa intsingiselo okanye undoqo waloo ntetho.

Kweliny’ icala umnqonqo wona umsebenzi wawo kukuthutha imiyalezo esuka ebuchotsheni uwuse kuwo onke amalungu omzimba iphinde ibuye. Oko kukuthi umnqonqo ngumthunywa wengqondo.

Mandeze umzekelo endicinga ukuba uzakucaca nakuthathatha. Masithi mhlawumbi uhlatywa liliva elunyaweni. Kuvamile ke entethweni yemihla ngemihla ukuthi iliva limeva. Xa ndithetha ngeliva ndikwathetha imeva okanye xa ndisithi imeva ndikwatsho iliva. Ngeli xesha uhlatywa ngalo umnqonqo ubaleka nangaphezulu konkuqhwanyaza kweliso uyokuxela ebuchotsheni ukuba ikho lento ingena enyameni eyenza iintlungu. Kwangoko ubuchopho busebenzisa iiseli zabo ukuze kujikwe lento iza nomnqonqo ukuze ibengumyalezo. Oko kukuthi umyalezo lo uyajikwa ubeyingqiqo ukuze kukwazeke ukuwunika intsingiselo. Ingqiqo le kukusebenzisa ingqondo ukunika intsingiselo yomyalezo. Kungoko ubuchopho bukwazi ukusabela bubuye buphendule imiyalezo yomnqonqo.

Kulo mzekelo weliva ingqondo itsho kwangoko ukuba uyahlatywa elunyaweni kwaye kufuneka uliphakamisile ukuze lento ikuhlabayo ingangeni yendele. Kwaye ingqondo ithi phakamisa unyawo