Afrikaner: MC 21-0918
Eienaar: Pierre-André Cronjé
Die Grootkuil Afrikaner-stoetery van Pierre-André Cronjé van Theunissen se strewe is om bulle te teel wat vir hul kliënte meer wins maak. “Ons wil graag die boer se insette verlaag, maar nog steeds ’n maksimum uitset met goeie groeieienskappe verseker,” sê hy.
Dit is juis op hierdie gebied waar vanjaar se Afrikaner-rasverteenwoordiger, MC 21-0918, uitblink. Hy is geteel uit teelmateriaal van wyle David van der Linde van Standerton se Geelbos-stoetery, en Pierre-André glo hy gaan nog diep spore trap. “Met ’n uitstekende groeiwaarde-indeks van 134 weet ons sy nageslag sal groei, of dit nou in ’n voerkraal of op die veld is; kruiskalf of Afrikaner-kalf, groei sal hulle groei.”
Daarmee saam kom ál die kenmerkende gehardheidseienskappe van die Afrikaner wat vir die boer weer verminderde bestuursinsette beteken. ’n Bewys daarvan is ook die koeiwaarde-indeks wat ’n baie goeie 121 is.
Grootkuil Afrikaner-stoetery en die Afrikaner-ras as geheel spits hom die afgelope paar jaar daarop toe om meer diere in intensiewe groeitoetse te evalueer, veral fase C. Daarmee wil hulle groeidoeltreffendheid verder verbeter en dit aan die breër rooivleisbedryf bewys.
NAVRAE: 083 629 3491, bobcronje@gmail.com
Angus (rooi): RCM 21-0159 Roechama Maverick
Eienaars: Gert en RC (regs) Malherbe
Roechama Maverick uit die Roechama Angus-stoetery is geteel deur die Malherbes van Hertzogville, wat ’n gemengde boerdery bedryf. Hulle verbou mielies, koring, sojabone en sonneblomme as kontantgewasse, en hawer en radyse vir winterweiding. Die natuurlike weiding is hoofsaaklik soetgras en word sinvol teen 1 GVE op 10 ha belaai.
Die Malherbes bedryf ’n Angus- en Brangus-stoetery en boer ook kommersieel met albei rasse. Bulle word op tweejarige ouderdom in die stoeterye gebruik en op driejarige ouderdom op veilings verkoop.
Die boerdery bestaan ook uit ’n SA Vleismerino- en Suffolkstoetery en ’n kommersiële Vleismerino-kudde. Maverick se pa, RCM 19-157, sou die ras in 2022 verteenwoordig het, maar is ongelukkig ’n maand voor die skou dood. Sy maternale broer het die ras in 2020 verteenwoordig, maar die kompetisie is toe weens covid-19 afgelas.
Maverick is ’n donkerrooi bul
