OP 29 Desember 2013 het Michael Schumacher se lewe tot stilstand gekom. Alles wat hy was – die karre, vakansies, wêreldreise, glans en swier – het op ’n sneeubedekte helling tot ’n einde gekom.
Op ’n manier is Michael van daardie dag af vasgevang in tyd en sal hy altyd onthou word soos hy tóé was: een van die beste renjaers in die geskiedenis van Formule 1, met 91 oorwinnings, 155 besoeke aan die podium en sewe wêreldkampioenskappe.
Hy is nooit weer in die openbaar gesien nie. Sy vrou, Corinna, waak streng oor hom – hy lewe, maar nie soos ons dit ken nie.
Maar tyd het nie stilgestaan vir sy kinders, Gina-Maria (26) en Mick (24), nie.
