VOORUITSKOUING Rooivleis
Die rooivleisbedryf staan ná ’n moeilike laaste kwartaal van 2023, gekenmerk deur skerp dalings in die produsenteprys van bees- en skaapvleis, voor wesenlike geleenthede om weer kop op te tel.
Só meen Dewald Olivier, hoofbestuurder van Red Meat Industry Services (RMIS).
“Ons het in 2023 begin om die aanvoorwerk te doen en nou lê die inwerkingstelling van verskeie projekte voor om die rooivleisbedryf ’n krag in die groter landboubedryf te maak. Om dit reg te kry, is veral twee aspekte in die komende jaar uiters belangrik, naamlik die sanitêre heffing en diensverskaffing regdeur die waardeketting.”
Dewald sê RMIS het 13 projekte geïdentifiseer wat mettertyd uitgevoer sal word. “Die belangrikste hiervan is die insameling van inligting, gekoppel aan ’n strategie om die bedryf lewenskragtiger
