KZN-jongboer
Dit verg spanwerk om ’n suksesvolle boerdery te bou, in stand te hou en te laat groei. Die BH Gevers-boerdery is wel op so ’n stewige fondasie gebou, en KwaZulu-Natal se Jongboer van die Jaar, Heiko Gevers, gee volle erkenning hieraan.
Die jongste presisiemetodes vir ingewikkelde bosbou, Brangus-tipe beeste wat nou ’n volwaardige vertakking is, en ’n klein graanvertakking help hom nie net om meer wins te maak nie, maar skep werksekerheid in ’n omgewing waar werkskepping aan die agterspeen suig.
Dié boerdery is in die laat 1800’s deur Duitse immigrante gestig en is geleidelik ontwikkel deur vyf geslagte van Geversboeregesinne, waarvan die jongste Heiko (28), sy vrou, Cian, en hul babadogtertjie, Hannah, is.
Saam met hulle op die hoofplaas, Eben-Ezer, woon Heiko se ouers, Karl en Gudrun, en sy broer, Landolf, en sy gesin. Heiko is plaasbestuurder, Karl is die direkteur en vervoerbestuurder, Gudrun hou die finansiële leisels vas, en Landolf is bestuurder van masjinerie en toerustinginstandhouding.
“Dit is ’n reusespanpoging. Almal, ook ons werkers, het ’n belangrike rol om te speel en lewer ’n bydrae.”
As deel van die Geverse se opvolgingsplan het Karl Heiko aanvanklik touwys gemaak oor die algemene bestuur, en hy het vaardighede geslyp, soos die bestuur van die arbeidsmag, werktuie en toerusting, en gewone beplanningstake. Terselfdertyd het Heiko sy eie idees ontwikkel om sy pa se praktyke aan te vul of te moderniseer waar nodig.