Beter, bestendige opbrengste met minder stikstof en ’n opbou van koolstof in die grond is net twee van die verblydende tekens wat blyk uit proewe met herlewingslandboupraktyke by aartappels.
Die besproeiingsplaas naby Lichtenburg wat amptelik verlede jaar deel van die McCain Global-groep se Farms of the Future-program (FoF) geword het, bly in wese ’n aartappelplaas vir die produksie van aartappels vir slaptjips.
Die eerste FoF-plaas is in Kanada en die Noordwes-plaas is die tweede. Die doelwitte van die program sluit in om grondgesondheid te verbeter, voedingstowwe en water doeltreffender te gebruik, minder produksiemiddele-vrystellings te verminder – alles sonder om opbrengs in te boet en om terselfdertyd koste te verlaag.
