Dit is beter om te weet as om te hoop, en diepgaande kennis van beheerbare faktore hou volgens Randy Dowdy die sleutel om doeltreffender te boer.
Randy wag op ’n vlug terwyl hy vanuit Amerika met Landbouweekblad praat, kort voor hy na Suid-Afrika sou vlieg vir ’n uitverkoopte konferensie waartydens hy sy praktyke en benadering uiteensit.
Dié nederige reus met drie wêreldrekords op sy kerfstok sal jy nooit van oorgerustheid kan beskuldig nie.
“Daar is altyd iets nuuts om in boerdery te leer. Ek is deurentyd self besig om te leer by medeboere reg oor Amerika en reg oor die wêreld. Met my vorige besoek aan Suid-Afrika het ek goeie vriende gemaak, en dit was interessant om te hoor van die struikelblokke waarmee boere daar te doen het.”
Randy het die afgelope tyd ál meer vrae van boere begin kry oor hoe om die opbrengs op belegging beter te bestuur.
“Ek probeer dus die proewe en kennis wat ek oor die afgelope jare opgebou het, in werklike, op-die-plaas-toestande toepas om so winsgewend moontlik te wees. Die belangrikste manier
