FOKUS VAL-BOEREDAG
As jy vanjaar een van die verwagte 4 000 besoekers aan die Val-boeredag wil wees, moet jy solank jou vellies afstof, jou hoed uit die kas haal en 5 Julie op jou kalender afmerk, want dit beloof om een van die beste boeredae nóg te wees.
“Verlede jaar se dag was goed, maar dit was die eerste een nadat die covid-19-regulasies opgehef is en mense was nog skrikkerig. Vanjaar gaan ons alles uithaal om dit die beste Val-boeredag in die geskiedenis te maak,” sê Brett Gordon, voorsitter van die Waterval-boerevereniging wat die verrigtinge op Val in Mpumalanga aanbied.