AMPTENARE van die departement van minerale hulpbronne en energie het die afgelope maand voorbrand gemaak vir die opheffing van die heersende moratorium op skaliegasontginning deur hidrobreking, en gesê die enorme gasreserwes kan ’n era van energiesekerheid en ’n invloei van buitelandse valuta meebring.
Dr. Phindile Masangane, uitvoerende hoof van die petroleumagentskap van Suid-Afrika (Pasa), het in die parlement gesê Suid-Afrika het ontginbare skaliegasreserwes van 209 000 miljard kubieke voet (209 tcf), teenoor die 1 tcf aardgas aan die Suid-Kaapse kus wat tot die vestiging van die Mossgas-aanleg by Mosselbaai gelei het.