Min werktuie het soveel gevorderde tegnologie as die hedendaagse graanstroper. Dit is die vlagskip, die verpersoonliking, van die tegnologie waartoe ’n vervaardiger in staat is en ’n bron van trots vir enige graanboer. En met rede.
Die graanoes is die boer se hoofdoelwit of reason d’etre. Alle praktyke – van grondbewerking tot kultivarkeuse, plant, bemesting en bespuiting – kom in die strooptyd bymekaar wanneer die stropermonitor skoolrapport speel vir die boerdery se suksesse of teleurstellings. Daarom is tegnologiese vernuwing wat tot beter of doeltreffender strooppraktyke lei, noodsaaklik.
Mededinging onder vervaardigers om die beste tegnologie na hul stropers te bring, is straf en nuwe ontwikkelings vind byna jaarliks plaas. Landbouweekblad het by van hierdie vervaardigers gaan kers opsteek om die jongste tegnologie in oënskou te neem ten einde boere te help om winsgewender te wees en volhoubaar te bly boer.
Star Wars vir jou stroper
Een van die belangrikste aspekte van hedendaagse stropertegnologie is dat dit aanpasbaar is.
“Plase verskil op soveel vlakke dat daar nie meer ’n enkele oplossing vir alle stroperbehoeftes bestaan nie. Topografie, grondtoestande, graangehalte, werksure en verskillende praktyke vereis ’n aanpasbare werktuig wat graan doeltreffend kan stroop,” het Jacques van den Berg, taktiese bemarker vir Afrika en
