Hittestres het ’n beduidende nadelige uitwerking op die immuunfunksie en gesondheid van melkbeeste in alle stadiums van hul lewensiklus. Dit raak alle funksies van die bees, onderdruk die immuunstelsel en ondermyn die dier se voortdurende poging om ’n toestand van homeostase te handhaaf.
In ’n reeks van drie artikels word gekyk na hoe klimaatsverandering – hoofsaaklik die geleidelike toename in die gemiddelde omgewingstemperatuur – die voorkoms van hittestres by melkkoeie verhoog, met ’n gevolglik nadelige impak op melkproduksie en besettingsyfers.
KLIMAAT EN MELKBOERDERY
Aardverwarming word hoofsaaklik veroorsaak deur die opbou van kweekhuisgasse, met koolstofdioksied (CO2) as hoofbydraende faktor.
Sedert die begin van die twintigste eeu het die gemiddelde atmosferiese temperatuur met sowat 0,74 °C gestyg. In Suid-Afrika