AS JY nie van beter geweet het nie, sou jy kon sweer die twee vroue hier voor jou is ’n ma en haar dogter – hulle lyk dan op ’n druppel na mekaar. Almal sê so.
Daar’s hul eenderse modekeuses en glansende gitswart lokke. Albei vroue het heelwat selfvertroue en hulle klink selfs na mekaar. O, en gee jy hulle die geleentheid, poseer albei met ’n pruilmond vir die kameralens.
Maar die skoonheid Tereza Troskie-Herbst het natuurlik nooit ’n dogter van haar eie gehad nie. Reinette Harms (32) is bloot ’n vriendin, of so het die twee die buitewêreld die afgelope paar weke vertel.
Maar vir Tereza, verklap hulle vandag in ’n eksklusiewe onderhoud met Huisgenoot, is sy soveel meer: Reinette is ’n surrogaatma – sy is die vrou wat op 53 weer van Tereza en haar man, Bennie (42), ouers gaan maak.
“Ek kan dit amper steeds nie glo nie,” sê Tereza emosioneel en druk Bennie, ’n sakeman, se hand. “Ons gaan weer mamma en pappa word. Ek het nie gedink ek sou daardie frase ooit weer hardop sê nie.”
Die voormalige skoonheidskoningin en haar spiertier is in September 2016 in rou gedompel toe hul babaseun, Jayden, se hartjie net ses dae ná sy
