Wyle dr. Lucas Potgieter het maar altyd ’n sagte plekkie vir alleenloperbulle- en ramme gehad. Veral die uitgestote ou buffel- en blouwildebeesbulle het hom na aan die hart gelê. In die meeste gevalle is die alleenlopers gewoonlik die uitgestote bulle of ramme in die trop wat moes plek maak vir die jonger, sterker en meer viriele troonopvolgers. Soms is daar egter ’n paar van die alleenlopers wat weens ander faktore nie deel van die trop uitmaak nie. Partykeer is dit omstandighede buite die alleenlopers se beheer en ander kere wil ’n mens glo hulle verkies om hul eie ding buite die trop te doen.
In die laat sewentigerjare van die vorige eeu het my pa en sy buurman ’n jagplaas sowat 55 km buite Bloemfontein in die Verkeerdevlei-distrik van die Sentraal-Vrystaat op die been gebring.
Die veld het bestaan uit tipiese ysterkliprante, klowe, vleie en grasvlaktes –die tuiste van troppe blesbokke, springbokke, rooibokke en swartwildebeeste wat gejag kon word. Destyds is blesbokke teen R2/kg (karkasgewig) en springbokke teen R50 per bok aan jagters verkoop. Rooibokramme kon gejag word teen R150 per bok.
