BELEËRDE GARSBEDRYF KRY VYFJAARPLAN
Die afgelope paar jaar was nie goed vir die garsbedryf nie, en die vyfjaarplan waarby die hele bedryf betrek word, gee hoop dat die situasie omgekeer kan word.
“Die garsbedryf is op ’n laagtepunt. Dit klink dalk pessimisties, maar ek glo ons kan nou die boublokke opstel om die bedryf terug te bring,” sê mnr. Jose de Kock, boer van Napier en voorsitter van Graan SA se garsspesialiswerkgroep.
Hy put inspirasie uit die verskil wat die omkeerstrategie in die koringbedryf gemaak het en hoe die kanolabedryf sy struikelblokke hanteer.
Die vyfjaarplan was sy voorstel en deel van ’n strategie om alle betrokkenes te laat saampraat.
“Die uiteinde moet ’n vyfjaarbedryfsplan wees. Dit help nie ek het ’n plan en die opbergers, die kopers, landboubesighede en boere koop nie in op die plan nie.”
De Kock sê die uitgebreide werkgroep gaan besluite neem en verantwoordbaar wees. “Dit gaan nie net ’n gepraat wees nie.”
“Die belangrikste is dat ons gereeld met mekaar kan kommunikeer oor prosesse en probleme. Daardie koördineringsrol lê by ons as boere. Ons
