Groeipotensiaal streek vir streek bekyk
In die suide van KwaZulu-Natal verdien boere gemiddeld R354 483/ha uit hul makadamiaboorde, en in die noorde van dié provinsie en by Mbombela in Mpumalanga sowat R250 000/ha. By Tzaneen in Limpopo verdien hulle net meer as R220 000/ha, en by Barberton amper R215 000/ha. In Levubu het boere die afgelope tyd slegs R86 557/ha met makadamias verdien.
Dít is van die inligting uit ’n drie jaar lange normestellingstudie van Source BI, ’n onafhanklike landboudata-en-ontledingsmaatskappy op Tzaneen.
Normestelling behels getroue rekordhouding wat boere in staat stel om die verskil in opbrengs en gehalte te meet wanneer hulle veranderinge in hul bestuurstelsels en programme aanbring.
