DÍt is waarom Bill Gates plaasgrond opkoop
Toe navorsers van die Amerikaanse publikasie The Land Report probeer vasstel wie onlangs byna 6 000 ha landbougrond in die opvangsgebied van die Columbiarivier in die deelstaat Washington gekoop het, was hulle uiters verbaas om uit te vind dit was die sakeman Bill Gates. Tot hul verdere verbasing het hulle later vasgestel dat dié stigter van Microsoft reeds 98 000 ha plaasgrond in verskeie deelstate van Amerika besit.
Naas die feit dat hy die derde rykste mens ter wêreld is, maak die plaasgrond wat hy besit, van hom die grootste enkele private eienaar van grond in Amerika. Dit laat onvermydelik die vraag ontstaan waarheen Boer Bill met sy boerdery op pad is.
Die kort, voortydige antwoord is dat Gates dit hoegenaamd nie oorweeg om self te gaan boer nie. Hier volg die lang antwoord.
GESONDE BELEGGINGSWAARDE
Plaasgrond was etlike dekades lank nie ’n algemeen bekende bateklas waarin finansiële beleggers belang gestel het nie. Selfs nadat alternatiewe beleggings aan die einde van die vorige eeu algemener geraak het, het slegs enkele fondsbestuurders na die landbousektor as ’n moontlikheid gekyk.
Verskeie struikelblokke het in die pad van beleggers gestaan. Die gediversifiseerde vertakkings waarvoor landbougrond gebruik word, die hoofsaaklik eenmansaakboere as eienaars en die gebrek aan deurdagte kennis oor die fundamentele waarde van plaasgrond, is maar enkeles wat opgenoem kan word.
Sedert die begin van hierdie eeu het die gety egter
