As iemand wat in die destydse Noord-Transvaalse Bosveld grootgeword het, is die rooibok vir my eie aan die rooibos-, kremetart- en mopaniebome wat so mildelik in hierdie gedeelte van ons land voorkom. My eerste “regte” bok wat ek geskiet het, was ’n rooibok. Alhoewel ek al baie geleentheid gehad het om rooibokke te jag, bly dit ’n dier waarvoor ek ’n groot sagte plek het.
DIE WETENSKAPLIKE WEESKIND
Die rooibokke van Suider-Afrika, waaronder Suid-Afrika, Botswana, Mosambiek, Zimbabwe, Zambië, Malawi en Swaziland, word almal as die sogenaamde suidelike rooibok (Aepyceros melampus melampus) geklassifiseer. Hulle kom in wydverspreide gebiede van die provinsies Limpopo, Mpumalanga, KwaZulu-Natal en Noordwes voor en is sonder twyfel die volopste spesie op baie plase.
Die swartgesig-rooibok ) van noordelike Namibië en suidelike Angola is ’n redelik gespesialiseerde subspesie wat deur die Internasionale Unie vir Natuurbewaring (IUCN) as kwesbaar geklassifiseer word. ’n Beperkte hoeveelheid van hierdie bokke word elke jaar deur trofeejagters gejag, maar met ’n totale populasie van slegs sowat 4 000 diere is hulle