HUL KINDERS, HUL LEWE
“Toe ek daai eerste keer my kind se hartklop hoor, het ek geweet ons is geseën.”
JODY ABRAHAMS
Een is ’n nice guy – altyd reg met ’n glimlag, sy kitaar en gereed om te braai. Die ander een is ’n biker wat al lankal die wag voor sy mond weggejaag het en wat mal is oor bier en vroue. Al is hulle wêrelde uitmekaar, kan Arendsvlei-kykers nie wag om te sien wat dié twee volgende gaan doen nie. En in die regte lewe verskil Sherman Pharo (Thys Cupido) en Jody Abrahams (Lionel Foster) ook hemelsbreed. Maar, as daar een ding is waaroor dié twee saamstem, is dit hoe vaderskap hul lewens verander het.
“Ek wou nooit eens ’n pa gewees het nie. Die hele familie-en-kindersding was nooit in my plan nie. Dit het my heeltemal onkant gevang,”erken Jody (46), pa van Olivia Rose (10) en Thomas (7).“Maar toe ek daai eerste keer my kind se hartklop hoor, het ek geweet ons is geseën en ek is nou vir die res van my lewe vir haar verantwoordelik. Ek was toe uiteindelik dapper genoeg om die drake weg te jaag…”
Ouerskap het verseker sy fokus en sy waardes verander. “My lewe was nooit vir my belangrik nie. Ek het kanse gevat en gedoen wat ek wou. Maar toe ek pa word, het ek besef ek kan nie net uitgaan, vinnig ry en impulsiewe dinge doen nie, want ek is nou verantwoordelik vir my gesin.”
