Boer deel oorloopbeker met ander

Ultrahoëdrukbeweiding is nes saamgestelde rente al die agtste wonder van die wêreld genoem. Dit is boonop ’n manier om in die tyd van droogte, hoë insetkoste en die koronavirus meer volhoubaar met ’n groter inkomstebron te boer én jou voorspoed met ander te deel.

Mnr. Gideon Oosthuizen van die plaas De Beerskraal naby Rysmierbult in die distrik Ventersdorp in Noordwes boer sedert 1990 saam met sy pa, Piet, en oom Deon op die familieplaas. Daardie jare het hy ’n melkery gehad en die veld is deur ’n stuk of honderd kommersiële vleisbeeste benut.

In 2002 het hy die melkery weens die lae melkprys verkoop en die boerdery met vleisbeeste begin uitbrei.

“Ek moes die hele plaas beter benut, maar het nog nie mooi geweet hoe nie. Op ’n dag vertel iemand my van Johann Zietsman se kursus oor ultrahoëdrukbeweiding,” sê Oosthuizen. Zietsman was in daardie stadium reeds bekend vir sy vernuwende denke oor beesboerdery en doeltreffende aanwending van veld met drukbeweiding.

Oosthuizen het een van sy kursusse bygewoon. Dit het sy hele benadering tot beesboerdery verander. Hy pas sedertdien ultrahoëdrukbeweiding toe, wat ’n swaarder veebelading as hoëdrukbeweiding behels. Die tipe en toestand van