So byna verlore
Pieter Malan ken van houe vat. Hy het op 23 sonder ’n kontrak gesit. Op 27 het hy sy sport byna vaarwel toegeroep om ’n verkoopsman te word, ná vier jaar se baklei in semi-professionele krieket.
Daarom het sy wêreld tegelykertyd stilgestaan én verbygeflits toe hy verlede week op 30-jarige ouderdom sy toetsbuiging gemaak het en so byna die tweede toets teen Engeland vir Suid-Afrika help red het.
“Ek het gister gedink dis nog die 3de Januarie, toe ek probeer uitfigure of ’n winkel oop is,” sê Malan Donderdag uit Kaapstad. Twee dae vroeër was sy 84 in die Proteas se tweede beurt net-net nie genoeg om ’n dramatiese nederlaag op Nuweland te verhoed nie.
Dit sou hom wel ’n plek in die span verseker vir die derde en voorlaaste toets in die Baai, wat Donderdag begin met die reeks op 1-elk in die weegskaal.
