JAG MET DIE KRUISBOOG

Baie geweerjagters wat reeds die meeste wildspesies met hul roere platgetrek het, is op soek na nuwe uitdagings. ’n Boog of ’n kruisboog sal gewis vir nuwe ervarings en avonture in die jag-veld sorg. Maar wat is die beste vir jag – ’n tradisionele boog/ kragboog of ’n kruisboog?

Daarmee kan ek ongelukkig nie help nie, want die een is nie noodwendig beter as die ander nie. En watter een van die twee wapens ’n jagter die beste sal pas, sal afhang van sy persoonlike voorkeure. Die konvensionele jagboog het gewis ’n romantiek van sy eie en min boogjagters sal maklik hul boë vir ’n kruisboog ruil. Om die waarheid te sê, ’n kruisboog het vir baie jare ’n slegte naam gehad en geen boogjagter met selfrespek sou daaraan raak nie. ’n Reeks toetse is so ’n paar dekades gelede in die VSA gedoen en die kruisboë van daardie jare het glad nie goed gevaar