DIE .22 HORNET – VEELSYDIGER AS OOIT
Die springbokooi draf rustig weg van die bakkie af. Ek en vrind Nicol Brand het toevallig op haar afgery terwyl ons waters om ry. Toe die bok vir ’n oomblik vassteek, het ek die kruishaar agter haar kop laat vassuig en die sneller gedruk.
Dit was my eerste kopskoot en ook my eerste bok met die toenog-vreemde kaliber vir my, die .22 Hornet. Dit was ook soos die mense sê, liefde met die eerste oogopslag, of is dit eerder met die eerste springbok-skietslag?
MY EIE EEN
Na daardie ooi het ek heelwat springbokke met die Hornet geskiet. Ek het ook alles wat ek te lees kon kry oor dié kaliber gelees. Koos Barnard (SA JAGTER/HUNTER se redakteur) se artikels in Magnum het my oortuig dat ek ’n Brno ZKW465 soek, en klaar. Dié geweer het ’n ware mini-Mauseraksie met gekontroleerde voer en ’n breë uittrekker. Die kwaliteit van die ZKW465-geweertjies is uitstaande en dié Brno’tjies lyk net vir my “reg”. Ek het egter gesukkel om een in die hande te kry – soms was geld ’n kwessie of ek kon nie een in ’n goeie toestand opspoor nie.
Later was ek moedeloos en plaas toe maar ’n advertensie op Facebook dat ek so ’n geweertjie soek. Na drie dae reageer iemand, maar toe ek na foto’s van die geweer
