Maagpyn en rose
Dit het alles 38 jaar gelede ná haar geboorte begin. “Geluk met jou dogter, mevrou Blom, die hele 4,5 kg van haar! Wat gaan julle haar noem?”
“Dit sóú Bernardus Andreas gewees het …”
Toe haar ma verder swyg, het suster Bruwer ingegryp: “Blom. Dan is sy baba Blom.”
Hoewel haar identiteitsdokument verklaar sy is Belinda Blom, word sy selde só genoem.
Toe sy vyf was, het klein Bernardus uiteindelik sy opwagting gemaak. “Gaan speel buite, Blom, jy gaan vir Boeta wakker raas.”
Die volgende jaar het haar ma opsluit tot die gevolgtrekking gekom dat dit in Blom se “beste belang” is om liewer skool toe te gaan.
“Maar Getruida, Blom het nog nie eens haar babavet afgeskud nie,” het haar ouma wal gegooi, maar verniet.
Te oud vir die kleuterskool en te jonk vir graad 1, het Gertruida Blom voet
