這張清楚 ê NGC 3628 望遠鏡景色內底，有一个蓬鬆蓬鬆 ê 星系盤，中央去予烏暗 ê 塗粉帶切做兩爿。是講這幅雄偉 ê 側向捲螺仔星系 肖像，予一寡天文學家 想著 伊閣有一个流行 ê 偏名，號做美國割包星系。NGC 3628 下底附近有一个較細 ê 星系，應該是伊 ê 衛星星系。伊閣有一條足暗毋過搝甲足長 ê 潮汐尾溜。這條搝甲長長 ê 尾溜有 30 萬光年長，超過這幅圖倒爿 ê 範圍。Tī 本地宇宙內底，NGC 3628 kah 伊厝邊兩个大型捲螺仔星系 M65 kah M66 是一組--ê，in 就叫做 獅仔座三生仔。發生 tī 宇宙厝邊之間 ê 重力 交互作用，可能是製造潮汐尾溜 ê 原因，嘛是造成捲螺仔星系盤 噴出物質 kah 變形 ê 原因。這个美麗 ê 島宇宙 差不多有 10 萬光年闊，kah 咱 ê 距離有 3500 萬光年遠。伊就 tī 北方 ê 春季星座，獅仔座遐。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230414/ 影像：Mike Selby & Mark Hanson 音樂：P!SCO - 鼎鼎 聲優：蔡老師 翻譯：An-Li Tsai (NCU) 原文：https://apod.nasa.gov/apod/ap230414.html Powered by Firstory Hosting