這个大型 ê 塗粉柱叫做 圓錐星雲，內底有足濟恆星當咧形成。氣體塗粉雲 是 恆星托兒所，會生出足濟新 ê 恆星。內底 ê 雲錐、雲柱、kah 壯觀 ê 雲流，攏是恆星 ê 高能風 kā 雕出來--ê。圓錐星雲 是一个足好 ê 例，伊就 tī 明亮銀河 ê 恆星形成區 NGC 2264 內底。這張 最近翕--ê 圓錐星雲，是用 智利 El Sauce 天文台 內底 直徑半公尺大 ê 望遠鏡，kā 24 點鐘久 ê 感光影像疊起來 ê 結果。圓錐星雲 ê 圓錐雲柱有 7 光年 長，伊就 tī 釘仔馬座 (嘛叫做 麒麟座) ê 方向，離咱有 2500 光年 遠。相片頂懸 ê 懸質量恆星 NGC 2264 IRS ê 恆星風，可能是 雕出 這个 圓錐星雲 ê 來源。圓錐星雲 ê 紅色面紗是發光 ê 水素氣體產生--ê。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230110/ 影像：Matthew Dieterich 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap230110.html Powered by Firstory Hosting