2023 年 ê 頭一个月圓 會出現 tī 今仔暗 23:08 UTC (世界時)，kah 日頭相對 ê 位置。這馬是伊 上光 ê 時陣，伊大閣媠，tī 天頂是足好揣--ê。予你做一个參考，這个特別 ê 天文影像計畫，是 kā 2022 年規年 tī 斯里蘭卡翕著 ê 月圓，鬥做這張相片--ê。2022 年這 12 粒月圓 ê 名、月份、佗一工，攏標示 tī 這張圖內底。逐粒月圓 ê 視寸尺 kah 伊是 倚 近地點 抑是 遠地點 偌近有關係。近地點就是月球 tī 長株圓軌道 行到離咱上倚彼點。遠地點就是伊 tī 長株圓軌道 行到離咱上遠彼點。像 2022 年 ê 狼月是 tī 半暝 1 點，今仔日 ê 月圓是出現 tī 遠地點附近 2 工內。毋過 kah 2022 年無仝， 2023 年 會拄著 13 擺 ê 月圓，按呢 kah 時鐘 ê 12 點鐘就袂鬥搭矣。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20230106/ 影像：Niveth Kumar 音樂：P!SCO - 鼎鼎 聲優：草莓大福 翻譯：An-Li Tsai (NCU) 原文：https://apod.nasa.gov/apod/ap230106.html Powered by Firstory Hosting