今年 年尾，火星會繼續 tī 地球夜空 ê 金牛座附近閃閃爍爍。Tī 這張 天星滿滿 ê 視野範圍內，主要是黃色調--ê。內底有 金牛座 α 星，嘛叫做畢宿五。另外閣有畢宿星團 kah 昴宿星團。相片倒爿是 有 V 形船碇 ê 畢宿星團。雖罔講 紅巨星 畢宿五 出現 tī 遐，毋過伊毋是畢宿星團 ê 成員。畢宿星團離咱有 151 光年遠，是離咱上倚 ê 開放星團。畢宿五 tī 仝一个方向，毋過伊 kah 咱 ê 距離是無夠一半。正爿是去予編做 Messier 45 ê 開放星團，離咱有 400 光年遠。伊嘛叫做昴宿星團，抑是 七姊妹仔星團。Tī 希臘神話內底，「昴」是 扛一粒天球 ê Titan 族天神 Atlas kah 海洋女神 Pleione ê 七个查某囝。 ——— 這是 NASA Astronomy Picture of the Day ê 台語文 podcast 原文版：https://apod.nasa.gov/ 台文版：https://apod.tw/ 今仔日 ê 文章： https://apod.tw/daily/20221230/ 影像：Gabor Balazs 音樂：P!SCO - 鼎鼎 聲優：阿錕 翻譯：An-Li Tsai (NCU) 原文：https://apod.nasa.gov/apod/ap221230.html Powered by Firstory Hosting