DIT was ’n skok. Kate twee weke lank in die hospitaal? Afgeboek tot ten minste Paasfees? Die prinses van Wallis was nog altyd die toonbeeld van goeie gesondheid.
Min inligting is beskikbaar. Al wat ons weet, is dat sy ’n buikoperasie nodig gehad het, dat haar toestand nie kanker behels nie, en dat sy versoek het dat “haar persoonlike mediese inligting privaat bly”. En toe laat val die paleis nog ’n bom: Koning Charles het ’n vergrote prostaat waarvoor hy ’n “regstellende prosedure” sou kry. Kenners meen die twee aankondigings dui op ’n verandering in aanslag deur die koningshuis. In die verlede is koninklike gesondheidskwessies so privaat moontlik gehou. Dit wat uitgelek het, was vaag en positief.
