Klimaatsverandering kan droogtes veroorsaak en tot gevolg hê dat gemiddelde dag- en nagtemperature toeneem, of dat temperatuur wisselvalliger raak met meer of minder koue en warm uiterstes in die vorm van ryp en hittegolwe.
Dit hou verreikende gevolge vir koringplante in omdat opbrengste skerp kan daal as gevolg van langdurige blootstelling aan die ongunstige toestande.
Dr. Elmarie van der Watt van die departement grond-, gewas- en klimaatswetenskap aan die Universiteit van die Vrystaat het onlangs verduidelik wat met strukture en funksies in koringplante gebeur as hulle aan hitte, droogte en ryp blootgestel word.
“Koring is baie gevoelig vir hittestres. Vir elke verhoging in temperatuur van 1°C bo die optimum temperatuurreeks van 19-22 °C in die blomvorming- en graanvullingstadium, verlaag opbrengs met 6%.”
Volgens haar gebeur dit omdat plante in normale toestande water opneem en transpireer. “As daar nie water is nie, neem transpirasie af. Dit veroorsaak dat water stadig uit die blare verlore gaan en die blare se temperatuur verhoog. Die plant doen dan hitteskade op.”
Van der Watt het op Bewaringslandbou Wes-Kaap se jaarlikse BLWK Jack Human-bewaringsweek by Elsenburg gesê bewaringsboerderypraktyke