Van die wêreld se stylvolste vroue is Frans. Dink maar aan bekendes soos Brigitte Bardot, Marion Cotillard en die weergalose Coco Chanel. Buiten hul mode-vernuf weet hulle instinktief hoe om hulself mooi te maak. Hulle kry die balans net rég: Subtiel dog treffend, moeiteloos dog afgerond, elegant dog gemaklik; die toppunt van sjiek.
’n Groot aspek van Franse skoonheid is dat hulle nooit foutloosheid nastreef nie, maar eerder hul natuurlike skoonheid beklemtoom en selfs hul sogenaamde of “klein imperfeksies” vier. Só het Jeanne Damas, ’n Paryse beïnvloeder en skoonheidsentrepreneur, in ’n onderhoud met die aanlyn leefstylblad gesê. Meer. “In Frankryk, pleks van jonger probeer lyk, strewe vroue daarna om die beste te lyk vir waar hulle is in hul lewe. Skoonheid gaan meer oor die hele pakket; om soos jou beste self te voel.” Hiér is Franse vroue se topgeheime.