JY vra die miljoendollar-vraag!
Dít was telkens die reaksie van boere op Landbouweekblad se vraag oor wat ’n El Niño-verskynsel in die komende somer gaan oplewer en hoe hulle die risiko gaan aanpak.
Een ding is egter seker: Plant, gaan hulle plant, El Niño of nie.
“Ons is nie vreesbevange of paniekerig daaroor nie, al beskou ons die voorspelling ernstig,” sê Anton Botha van die plaas McGrath’s Park, oos van Bultfontein. Uit vorige droogtes, ook in die vorm van midsomerdroogtes, het ons geleer om deegliker planne te beraam en die tegnologie tot ons beskikking te gebruik.”
Soos baie ander boere met wie Landbouweekblad gepraat het, maak Botha melding van die goeie ondergrondse vog wat steeds ná die nat siklus benut kan word.
“Ons gaan beslis na elke land se vogpotensiaal kyk
