Die geliefde Afrikaanse kookkompetisiereeks Kokkedoor is ná vier jaar terug op die kassie – en hierdie keer is dit so eg Suid-Afrikaans as wat kan kom. Die knetterende vure, gloeiende kole, roosters en braaitange is hoe die deelnemers gaan rol in Kokkedoor: Vuur & vlam.
“Kykers gaan die baie geniet,” sê Wilmer Müller, die publisiteitsbestuurder van die reeks. “Daar is baie wat vir hulle bekend en geliefd gaan wees, soos die Kokkedoorspens, die platteland, die spangees tussen die deelnemers, die pret en die pyn van wen en verloor.”
