WIE WOON HIER? Hannes Stander en DP Ferreira, ’n groot familie honde en drie Maine Coon-katte
WAAR Knysna
GROOTTE 7 000 m²
GRONDTIPE Klei
OUDERDOM VAN TUIN 15 jaar
Waar daar eens feitlik geen tuin was nie, het Hannes Stander en DP Ferreira ’n lushof geskep waarin hulle hul liefde vir blomme en tuinmaak kan uitleef. “Ek het begin deur vir die hele tuin ’n meesterplan te teken wat ons stuk-stuk uitgevoer het,” vertel Hannes, wat ook eienaar van die tuinontwerpbesigheid Ecozest is. “Hier en daar het ons dit met verloop van tyd effens aangepas, maar die basiese plan het dieselfde gebly. As jy met ’n groot ruimte soos dié werk, is dit goed om ’n plan te hê sodat jy weet waarheen jy op pad is. Wanneer jy dan geld, tyd en energie het, kan jy die volgende deel aanpak, want jy weet reeds wat jy daar wil doen. Al is ons tuin nou al vyftien jaar oud, is dit steeds aan die ontwikkel en moet daar nog ’n hele paar goed gebeur.”
Highacre word met twee hoof-asse in vier tuinkamers verdeel. Die een as is ’n gekompakteerde grondvoetpad van 3 m), die ander ’n prieel waaroor rankrose, bloureën () en inheemse klimop () groei.