Wyn
Die jaar 1973 sal onthou word vir die onttrekking van Amerikaanse troepe aan Viëtnam en hoe liedjies soos “Crocodile Rock” en “Papa was a Rollin’ Stone” oor radio’s weerklink het. Vir die Suid-Afrikaanse wynbedryf was daar twee belangrike mylpale – die landgoedwynkonsep, asook die Wyn van Oorsprong-stelsel het die lig gesien.
“Ons waardeer dit dat ons geskiedenis deel is van ons toekoms,” het die wynpersoonlikheid Bennie Howard onlangs op ’n vieringsgeleentheid op Groot Constantia gesê, terwyl hy ’n afskrif van die Staatskoerant van 10 Augustus 1973 vertoon. Daarin het die eerste 14 landgoedere amptelik hul landgoedwynstatus ontvang.
“Dit is spesiaal dat dié eerste 14 steeds in bedryf is en wyn maak (hoewel nie almal landgoedwyn nie). Dit sê iets oor die wil om te oorleef, te groei en dinge beter te doen vir die toekoms.”
André Matthee, direkteur van reguleringsdienste by die Wyn-en-spiritualieëraad, vertel die idee vir landgoedwyne het destyds by die wynbedryf self ontstaan, onder meer by die Kaapse Landgoedwynprodusentevereniging.
“Hulle wou die geloofwaardigheid van landgoedwyn –