REEKSTEGNOLOGIE 360
Dit is die veelsydigheid van hommeltuie en hul vermoë om die nuutste tegnologie met presisie te kombineer vir akkurate toepassings, wat hulle so vinnig ’n onmisbare gereedskapstuk in byna elke faset van boerdery gemaak het.
Hommeltuie word deesdae toegerus met verskillende kamerategnologieë. Dit wissel van LiDAR, waar lig en laser ingespan word om afstand te meet en só tipografiese beelde te skep, tot multi-spektrale toestelle wat data in ’n spesifieke golflengte van die elektromagnetiese spektrum vasvang deur verskillende filters – self frekwensies wat nie met die oog gesien kan word nie, soos infrarooi en ultraviolet. Met die regte sagteware bied hierdie beelde insig oor aspekte soos plant- en dieregesondheid, grondvog en watervloeipatrone wat die raaiwerk uit boere se besluitneming haal.
Daarna kan die werkesels ingespan word: Die hommeltuie wat vrag kan dra en met byna chirurgiese presisie spuitwerk kan doen, saad kan strooi, vee kan aanjaag, medisyne kan aflaai en selfs kan help om gronddamme te seël.
Landbouweekblad het by ’n paar kenners op die gebied van hommeltuie in die landbou gaan kers opsteek om te hoor hoe en waar hulle hierdie wondergereedskapstukke oral gebruik.
Van vliegtuie tot hommeltuie
Thinus Pretorius is ’n hommeltuigvlieënier wat sy hommeltuie en dienste aan boere reg oor Suid-Afrika uithuur. Hy is een van die min hommeltuigoperateurs wat ook lisensies het om vastevlerkvliegtuie en helikopters te vlieg.
Sy werksaamhede met hommeltuie het begin toe hy ’n vriend gaan help het om wild te tel met
