KORTOM
■ Ineos, een van die wêreld se drie grootste petrochemiese maatskappye, het pas sy eerste produksievoertuig, die Grenadier, amptelik bekend gestel.
■ Die ekspedisie van John O’Groats in die noorde van Skotland het by Belgravia naby Londen geëindig, net daar waar die plan ontstaan het om een van die wêreld se taaiste 4x4’s te ontwikkel.
■ Jasper Raats van Landbouweekblad het die tweede been van die avontuur vanaf Inverness tot by Glencoe meegemaak.
Dit is snerpend koud toe ons die Sondagmiddag by die Inverness-lughawe op die Skotse Hoogland uit die vliegtuig klim. Ons kan bly wees ons was nie deel van die vorige groep nie, sê ons gashere van die Britse petrochemiese maatskappy Ineos. Tóé het die kwik glo tot tien grade onder vriespunt gedaal.
Ons groep Suid-Afrikaanse en Australiese joernaliste is deel van die vierde mediagroep wat die wêreldwye bekendstelling van Ineos se Grenadier in ’n avontuurbelaaide ekspedisie in die noorde van Skotland meemaak.
Oor die volgende twee dae is ons agter die stuur van hierdie nuwe veldwaens en kry die geleentheid om hulle behoorlik op die proef te stel, oor berge met sneeu op die pieke en deur dale met doeksag modder.
Die Grenadier het in 2017 ontstaan toe sir James