KORTOM
■ Sy droom om vlieënier in die lugmag te wees is dalk gekelder, maar dié jong boer bereik reusesukses deur ’n kombinasie van tegnologie en voete in die land en ’n vennootskapsboerdery.
■ Mnr. Daniël Opperman het eers “met die oog gekorrel”, maar pas nou presisieboerdery toe waardeur hy produksiekoste beheer en die grond optimaal benut.
■ Hy het sterk ondergrondse water, maar pas streng beheer toe om dit nie te oorbenut nie. ’n Boorgat word nooit vir langer as twee dae aaneen gepomp nie. Dan skakel hy oor na die volgende boorgat.
Dit is tot die landbou se voordeel dat die jong Daniël Opperman nie destyds vir opleiding as vlieënier in die Suid-Afrikaanse Lugmag gekeur is nie, want die pad wat hy daarna geloop het, het koers gekry landbou toe en tot sy bekroning as TLU SA se Jongboer van die Jaar vir 2022 gelei het.
Boonop het hy sy vliegdroom bewaarheid en op eie koste as kommersiële helikoptervlieënier gekwalifiseer. Nou vlieg hy ook hoog as groenteboer van formaat.
Opperman (40) boer op die plaas Smaldeel naby Mookgophong in vennootskap met me. Belinda Streicher le Roux, ’n ekonoom van Polokwane. Terwyl hy na matriek in 2002 op die Lugmag se antwoord gewag het, het hy solank by B&F Elektries van mnr. Barrie du Plessis op die dorp gewerk en sommer ’n ambag in