STU BOWIE
IG: @stubowie
Canon EOS 1D Mk. IV
Canon 100-400 mm-lens
STU SKRYF: Fotograwe probeer altyd foto’s in daai spesiale oggendof laatmiddaglig neem. Op dié oggend was ek in die Rietvleinatuurreservaat en kon hierdie rooihartbeeskoei en haar kalf afneem. Koeie kan uitgeken word aan hulle dunner horings.
Ek hou van hoe die twee byna eenders poseer, en hoe ek Mamma se oog wat byna-byna aan die kalfie se horing raak, kon vasvang. My verstellings was: sluiterspoed 1/1 600, lensopening f8 en ISO 140.
TOAST SÊ: Dié foto het my wraggies twee keer laat kyk! Baiekeer skep ’n dier wat só voor ’n ander staan ’n eienaardige foto, want ’n mensoog verkies diere wat apart van mekaar staan. Dis dan makliker om te sien waarna jy kyk.
Rooihartbeeste is onmiskenbaar en daar is geen twyfel waarna ’n mens hier kyk nie. Aangesien ma en baba sy aan sy staan, kan ’n mens duidelik die verskille tussen die twee waarneem. ’n Mens kan ook duidelik sien hoe die draairoomyshorinkies van die kleintjie later in sierlike krulhorings gaan verander.
Stu se lensopening van f8 is net wyd genoeg vir albei diere om skerp te vertoon. Die kalfie is inderwaarheid skerp en Mamma effe sagter, maar in dié drukgrootte is die verskil nie merkbaar nie.
Ek hou van die kleurpalet wat wissel van die rooibruin van die bok (ek is mal oor die rooi stof in Ma se horings) tot die sweempie groen
