Dit is 40 jaar sedert mnr. Jack Human die eerste tree na bewaringsboerdery gegee het om ’n stelsel te vestig wat vir groot stabiliteit en minder risiko in die Kaapse graanstreke sorg.
Die grootste vordering wat sedertdien gemaak is, is die breë aanvaarding van die praktyk, ondersteun deur die ontwikkeling van planters vir plaaslike omstandighede en doelgerigte navorsing, meen dr. Johann Strauss, ’n navorser oor volhoubare gewasstelsels by die Wes-Kaapse departement van landbou.
Volgens hom dink boere baie meer oor hul wisselbouprogramme en plantvoedingsbestuur. “Ons is egter nog nie heeltemal gemaklik om ons stelsels te vertrou om byvoorbeeld stikstof te verminder nie.”