Aan die einde van die optimale planttyd vir die oostelike saaigebiede, en met die aanvang van die westelike dele se planttyd rondom middel November, het oormatige reën nog op baie plekke somergraanaanplantings vertraag. Begin Desember was daar egter sowat twee weke se warmer sonskyndae en aanplantings van mielies en sojabone het fluks gevorder.
Dr. Werner Rossouw, direkteur van Silostrat, het middel Desember gesê in die sentrale en westelike dele van Suid-Afrika is die sojaboonaanplantings voltooi, en mielie- en sonneblomaanplantings het goed gevorder.
“Die een ding wat ons nou jaar ná jaar al hoe meer besef, is die vermoë van boere om ’n groot oppervlakte in ’n baie kort tydperk te kan beplant. Die meeste boere kan nou binne twee tot drie weke hul aanplantings voltooi, mits die weer saamspeel. Ons het ’n baie goeie twee weke ervaar.”
Volgens Rossouw was daar kolle in Mpumalanga en die Oos-Vrystaat waar boere
