KORTOM
■ Luidens nuwe navorsingsbevindinge word 66% van veral witrugaasvoëls en kransaasvoëls na bewering met lood besmet.
■ Die SA Jagters- en Wildbewaringsvereniging is die afgelope minstens sewe jaar betrokke by aasvoëlbewarings-enopleidingsprogramme.
■ Wildbedryf SA meen die studie is eensydig en het geen kontrolevergelykings om die gevolgtrekkings te kwantifiseer nie.
Die wild- en jagbedryf is warm onder die kraag oor ’n onlangse navorsingsverslag. Maar volgens die skrywer daarvan is dit nie kritiek op die jagbedryf nie, maar eerder ’n pleidooi dat jagters en wildboere alternatiewe ammunisie gebruik en nie besmette karkasse vir aasvoëls uitsit nie.
Me. Linda van den Heever, aasvoëlprojekbestuurder by Birdlife Suid-Afrika, het onlangs die bevindinge van haar vier jaar lange navorsing oor loodvergiftiging weens loodammunisie in jagkarkasse onder aasvoëls vir haar doktorsgraad in ’n wetenskaplike tydskrif laat publiseer.
In haar pos by Birdlife SA sien Van den Heever om na navorsing oor loodvergiftiging onder aasvoëls en die instelling van aasvoëlveilige sones.
Intussen sê die SA Jagters- en Wildbewaringsvereniging hy is aktief betrokke by aasvoëlbewaringsprogramme om die impak van loodvergiftiging by wild te bekamp. Die vereniging is lid van die internasionale vereniging vir omgewingsbewaring (IUCN) en die nasionale aasvoëltaakspan. Een van die taakspan se doelwitte is om aasvoëlbewaring onder verskillende belanghebbendes te koördineer en bewaringstrategieë te ontwikkel.