LEKKER PLAASLEWE
As ek terugdink, kan ek net sê my kinderdae was wonderlik. Ek het op ’n pragtige plaas naby Makokskraal in die Wes-Transvaal (Noordwes) grootgeword. My ouers het met Jersey-koeie vir room, skape vir slag, varke vir verkoop, hoenders vir slag en eiers, en mielies geboer. Die bulkalwers het tollies geword en was vir slagdoeleindes wanneer hul ses maande oud geword het.
Ons het 12 werksmense op die plaas gehuisves. Die kinders was my maatjies en ons kon tog te lekker speel. Die dame wat my mamma in die huis gehelp het, was my tweede ma.
Ons het vroeg elke oggend eiers uitgehaal uit die hoenderhok. Mamma was elke oggend vroeg by die stalle waar die koeie gemelk is. Ek het baie keer saamgegaan om die separator se handvatsel te draai om die room van die melk te skei. Die werkers het elkeen eers hul kwota melk vir die dag gekry en dan is die afgeroomde melk toegelaat om suur te word om vir die varke met hul meel te voer.
Ons het ’n hele boord met vrugtebome gehad en ook ál ons groente self gekweek.
Ek verlang nou juis na my mamma se tuisgebakte brood met room.
As kind het ek nooit geweet hoe die onheil broei wat nou sy kop so aspris uitsteek